आसन्न प्रतिनिधिसभा निर्वाचनका लागि रुपन्देहीका पाँच निर्वाचन क्षेत्रमध्ये हरेकमा कम्तीमा एक पूर्वमन्त्री उम्मेदवार बनेका छन् । रुपन्देहीमा एक बहालवाला र ७ पूर्वमन्त्री प्रतिनिधिसभा सदस्यतर्फ उम्मेदवार छन् । ५ मध्ये ३ वटा निर्वाचन क्षेत्रमा पूर्वमन्त्रीहरु बीच नै मुख्य प्रतिस्पर्धा हुने देखिएको छ । क्षेत्र नम्बर १, ३ र ४ मा पूर्वमन्त्रीहरु बीच नै मुख्य प्रतिस्पर्धा हुने भएको छ । क्षेत्र नम्बर २ र ५ पनि पूर्व मन्त्रीहरू चुनावी मैदानमा छन् ।
रुपन्देहीको क्षेत्र नम्बर १ मा एमालेका छविलाल विश्वकर्मा र हालै एमाले परित्याग गरी स्वतन्त्र उम्मेदवार बनेका घनश्याम भुसालबीच मुख्य प्रतिस्पर्धा हुने देखिएको छ । दुवै पूर्व कृषि मन्त्री हुन् । भुसाललाई सत्तारुढ गठबन्धनले साथ दिएको छ भने विश्वकर्मालाई राप्रपाको समर्थन छ ।
विश्वकर्मा २०६६ सालमा कृषि मन्त्री भएका थिए । एमाले लुम्बिनी प्रदेश इन्चार्ज समेत रहेका उनले २०७४ सालको निर्वाचनमा पनि यही क्षेत्रबाट जितेका हुन् । भुसाल हालै एमाले परित्याग गरी सत्तारुढ गठबन्धनको सहयोगमा उम्मेदवार बनेका हुन् । २०७७ सालमा कृषि मन्त्री बनेका भुसालले यस अघि क्षेत्र नम्बर ३ बाट चुनाव जितेका थिए ।
गत वैशाखमा सम्पन्न स्थानीय तहमा वडा अध्यक्षहरूले पाएको मतको आधारमा कांग्रेसको ३२ हजार ९९९ र एमालेको ३० हजार ३९४ मत छ । यस्तै राप्रपाको १४ हजार ५५२, माओवादी केन्द्रको ४ हजार २०२, एकीकृत समाजवादीको एक हजार २४३ र लोसपाको ३२५ मत छ ।
